You are here

ပြည်ထောင်စုသမ္မတမြန်မာနိုင်ငံတော် ဒုတိယသမ္မတ ဦးဉာဏ်ထွန်း မြန်မာနိုင်ငံတွင် နိုင်ငံခြားသား အမြဲတမ်းနေထိုင်ခွင့် (Permanent Residence System) (PR) စနစ် စီမံခန့်ခွဲမှု ကော်မတီ ပထမအကြိမ် လုပ်ငန်းညှိနှိုင်း အစည်းအဝေးသို့တက်ရောက်၍ အမှာစကားပြောကြား

ပြည်ထောင်စုသမ္မတမြန်မာနိုင်ငံတော် ဒုတိယသမ္မတ ဦးဉာဏ်ထွန်း မြန်မာနိုင်ငံတွင် နိုင်ငံခြားသား အမြဲတမ်းနေထိုင်ခွင့် (Permanent Residence System) (PR) စနစ် စီမံခန့်ခွဲမှု ကော်မတီ ပထမအကြိမ် လုပ်ငန်းညှိနှိုင်း အစည်းအဝေးသို့တက်ရောက်၍ အမှာစကားပြောကြား

Printer-friendly versionSend by email

 

နေပြည်တော် အောက်တိုဘာ ၃၁

လက်ရှိ မြန်မာနိုင်ငံတွင် တည်ဆဲဥပဒေအရ နှစ်နိုင်ငံ နိုင်ငံသားခံယူခွင့်  (Dual Citizen) ကို ခွင့်ပြုထားခြင်း မရှိပါကြောင်း သို့ဖြစ်၍ နိုင်ငံခြားသား စီးပွားရေးလုပ်ငန်းရှင်များ၊ အသိပညာရှင် အတတ်ပညာရှင်များ၊ ပြည်ပနိုင်ငံများတွင် နိုင်ငံသားခံယူထားသည့် မြန်မာနိုင်ငံသားများက မိမိတို့နိုင်ငံ၏ စီးပွားရေးဖွံ့ဖြိုးတိုးတက်မှု အချိန်အခါကောင်းကြောင့် မြန်မာနိုင်ငံကို လာရောက် ရင်းနှီးမြှုပ်နှံလိုကြသော်လည်း တည်ဆဲဥပဒေအရ နှစ်နိုင်ငံသား ခံယူခွင့်မရှိသည့်အတွက် အခက်အခဲများ ကြုံတွေ့နေရပါကြောင်း၊ ယင်းကိုဖြေရှင်းနိုင်သည့် နည်းလမ်းကောင်း တစ်ရပ်မှာ အမြဲ နေထိုင်ခွင့်စနစ်ပင် ဖြစ်ပါကြောင်း။

 

နိုင်ငံတော်သမ္မတကြီးအနေဖြင့် ၎င်းတို့၏အကျိုး၊ နိုင်ငံတော်၏ အကျိုးကို ရှေးရှုပြီး အမြဲတမ်း နေထိုင်ခွင့် (PR) စနစ်ကို ချမှတ်ကျင့်သုံးရန် တိုက်တွန်းအားပေးခဲ့ခြင်း ဖြစ်ပါကြောင်း၊ ယခုစနစ်အရ တစ်ဖက်နိုင်ငံသားဘဝကို စွန့်လွှတ်ရန် မလိုအပ်ဘဲ မိမိတို့နိုင်ငံ၌ ကာလအပိုင်းအခြားနေထိုင်ခွင့်နှင့် လုပ်ပိုင်ခွင့်များ ရရှိမည် ဖြစ်ပါကြောင်းဖြင့် မြန်မာနိုင်ငံတွင် နိုင်ငံခြားသား အမြဲတမ်းနေထိုင်ခွင့် (Permanent Residence System) (PR) စနစ် စီမံခန့်ခွဲမှု ကော်မတီဥက္ကဋ္ဌ ပြည်ထောင်စုသမ္မတမြန်မာနိုင်ငံတော် ဒုတိယ သမ္မတ ဦးဉာဏ်ထွန်းက ယနေ့နံနက် ၁၀ နာရီတွင် နေပြည်တော်ရှိ လူဝင်မှုကြီးကြပ်ရေးနှင့် ပြည်သူ့ အင်အားဝန်ကြီးဌာန အစည်းအဝေးခန်းမ၌ ကျင်းပသည့် ယင်းကော်မတီအစည်းအဝေးတွင် ထည့်သွင်း ပြောကြားသည်။

 

ရှေးဦးစွာ ဒုတိယသမ္မတ ဦးဉာဏ်ထွန်းက အမှာစကားပြောကြားရာတွင် ပြည်ထောင်စုသမ္မတမြန်မာနိုင်ငံတော်တွင်  မိမိတို့အစိုးရသစ် စတင်တာဝန်ယူသည့် အချိန်မှစ၍ ပြည်သူ့ဘဝ လုံခြုံရေး၊ တရားဥပဒေစိုးမိုးရေး၊ နိုင်ငံတကာ ပူးပေါင်းဆောင်ရွက်မှု တိုးမြှင့်ရေး၊ ကောင်းမွန်သော အုပ်ချုပ်မှုစနစ်နှင့် သန့်ရှင်းသော အစိုးရဖြစ်ပေါ်စေရေးတို့ကို ရည်မှန်းချက်ချ ကြိုးပမ်း ဆောင်ရွက်ခဲ့ရာ တိုးတက်အောင်မြင်မှုများစွာ ရရှိခဲ့ပြီးဖြစ်ကြောင်း။

 

ယခင်က အာဏာသုံးရပ်ကို တစ်ပေါင်းတည်း ကျင့်သုံးသည့် အာဏာပိုင်အစိုးရစနစ်ကနေ ဒီမိုကရေစီ နည်းလမ်းကျပြီး အပြန်အလှန် ထိန်းချုပ်မှုစနစ်များ ပါဝင်သည့် နိုင်ငံရေး ဖြစ်စဉ်ကိုလည်း ဖော်ဆောင်နိုင်ခဲ့ကြောင်း၊ စိန်ခေါ်မှုအများအပြားရှိနေသော်လည်း ဂုဏ်ယူဖွယ် အားတက်ဖွယ် ထင်ရှားသည့် အောင်မြင်မှုများ ပေါ်ထွက်လာနေပြီဖြစ်ကြောင်း၊ တိုးတက် ဖြစ်ပေါ်မှု မြောက်မြားစွာ ထဲကနေ အနည်းငယ်ကို ဖော်ပြရလျှင် ပြစ်ဒဏ်ကျခံနေသည့် အကျဉ်းသားများကို လွတ်ငြိမ်းချမ်းသာခွင့်ပေးခြင်း၊ ပြည်ပရောက် မြန်မာနိုင်ငံရေး အင်အားစုများကို သိက္ခာရှိစွာ ပြန်လည်ဝင်ရောက် ခွင့်ပေးခဲ့ခြင်း၊ စတုတ္ထမဏ္ဍိုင် ဟု ခေါ်ဆိုရသည့် သတင်းမီဒီယာအတွက် ကန့်သတ်ထားသော စာပေစိစစ်ရေးကို ပယ်ဖျက်ပေးခြင်း၊ အင်တာနက် လွတ်လပ်စွာ အသုံးပြုခွင့်ပေးခြင်း၊ အလုပ်သမား နှင့် အလုပ်ရှင် အသင်းအဖွဲ့များ ဖွဲ့စည်းတည်ထောင်ခွင့်နှင့် ပြည်သူများ နိုင်ငံရေးတွင် လွတ်လပ်စွာ ပါဝင်ခွင့်ပေးခြင်းစသည့် ဆောင်ရွက်ချက်များကို ဖော်ဆောင်နိုင်ခဲ့ကြောင်း။

 

ယင်းသို့ ပြောင်းလဲသွားသည့် နိုင်ငံရေးနောက်ခံရှုခင်းမြင်ကွင်း (Political Landscape ) နှင့်အတူ စီးပွားရေးနောက်ခံ ရှုခင်းမြင်ကွင်း  (Economic Landscape) ကလည်း လိုက်ပါ ပြောင်းလဲနေပြီဖြစ်ကြောင်း၊ ပြည်သူလူထုကြီး၏ လူမှုစီးပွားရေး ဘဝဖွံ့ဖြိုးတိုးတက်မှု (Socio-Economic Development )အတွက် လူထုဗဟိုပြု ဖွံ့ဖြိုးတိုးတက်မှု (People Centered Development )ကို လယ်ယာကဏ္ဍ၊ စက်မှုကဏ္ဍ၊ ကုန်သွယ်ရေးကဏ္ဍ၊ ဘဏ္ဍာရေးနှင့် ငွေရေးကြေးရေးကဏ္ဍတို့ အကောင်အထည်ဖော်ရာတွင် ငွေကြေး၊ နည်းပညာနှင့် လူသားအရင်းအမြစ် အရင်းအနှီးများအရေးတကြီး လိုအပ်နေချိန်ဖြစ်ကြောင်း၊ ယင်းလိုအပ်သည့် အရင်းအနှီးများကိုပြည်တွင်းကရော ပြည်ပမှာပါ ဖိတ်ခေါ်လျက်ရှိကြောင်း၊ မြန်မာနိုင်ငံ၏ စီးပွားရေး ရေခံမြေခံကောင်းများကို ငွေကြေး၊ နည်းပညာအရင်းအနှီးများဖြင့် နည်းလမ်းတကျ ပေါင်းစပ်ပေးနိုင်လျှင် အကျိုးဖြစ်ထွန်းမှာ မြေကြီးလက်ခတ်မလွဲ သေချာသည့် အတွက်ကြောင့် ကမ္ဘာအရပ်ရပ်မှ ရင်းနှီးမြှုပ်နှံလိုသူများ၊ မိမိတို့၏ ကုံလုံကြွယ်ဝသည့် ပညာနှင့် ဓနအင်အားဖြင့် အမိနိုင်ငံကျေးဇူးကို ပြန်လည်ပေးဆပ်ခွင့် စောင့်စားနေသော အခြားနိုင်ငံသား ခံယူထားကြသည့် မြန်မာများ စောင့်ကြည့် လေ့လာနေသော အချိန် အခါလည်း ဖြစ်ကြောင်း။

 

ပြည်ပအရင်းအနှီးများ အရှိန်အဟုန်ကောင်းကောင်းဖြင့် စီးဝင်လာရန်အတွက် ရင်းနှီးသူများ၏ အခွင့်အရေးကို ခိုင်ခိုင်မာမာကာကွယ်ပေးထားသည့် လုပ်သာကိုင်သာ အခွင့်သာသော ရင်းနှီးမြှုပ်နှံမှု ပတ်ဝန်းကျင်ကောင်း (Favorable Investment  Climate ) ဖန်တီးပေးထားရန်လိုကြောင်း၊ ယင်းပတ်ဝန်းကျင်ကောင်းများထဲတွင် တစ်ခုအပါအဝင် ဖြစ်သည့် ထိုရင်းနှီးမြှုပ်နှံ လိုသူများ၊ မိမိတို့၏ နည်းပညာကျွမ်းကျင်မှုဖြင့် ဝန်ဆောင်မှုပေးလိုသူများ၊ အကြောင်းအမျိုးမျိုးကြောင့် အခြားနိုင်ငံသားခံယူထားကြသည့် မြန်မာနိုင်ငံသားဟောင်း ဓနနှင့်ပညာကြွယ်ဝသူများ မြန်မာနိုင်ငံအတွင်း နှစ်ရှည်လများ လာရောက်အခြေချနေထိုင်ခွင့်ရရှိရေးပင်ဖြစ်ကြောင်း။

 

PR စနစ် ကျင့်သုံးခြင်းအားဖြင့် နည်းပညာ၊ အရင်းအနှီး၊ လူ့စွမ်းအား အရင်းအမြစ်များ၊ အလုပ်အကိုင်အခွင့်အလမ်းများ မိမိတို့ နိုင်ငံအတွင်းသို့ စီးဝင်လာနိုင်ပြီး နိုင်ငံတော် ဖွံ့ဖြိုး တိုးတက်ရေး အတွက် အထောက်အကူကောင်းများ ရရှိနိုင်မည်ဖြစ်သကဲ့သို့ နိုင်ငံတော်က ပေးအပ်သည့် အခွင့်အလမ်းကောင်းများ ဆုပ်ကိုင်ပြီး ကြိုတင်စီမံမှုများဖြင့် နယ်ပယ်အသီးသီးသို့ နည်းမျိုးစုံဖြင့် စိမ့်ဝင်ထိုးဖောက် ဝင်ရောက်မှုများ ရှိလာနိုင်ခြင်း၊ နိုင်ငံသားများအတွင်း ယှဉ်ပြိုင်မှုများ များပြားလာနိုင်ခြင်း၊ ရာဇဝတ်ပြစ်မှုများ များပြားလာနိုင်ခြင်း စသည့် ချို့ယွင်းချက်များလည်း  ကြုံတွေ့ရမည် ဖြစ်ကြောင်း။

 

PR  စနစ်ကြောင့် ဖြစ်ပေါ်လာမည့် ချို့ယွင်းချက်များကို ထိန်းကျောင်းကာကွယ်မဲ့စနစ်များ ချမှတ်ဆောင်ရွက်သွားရန် လိုအပ်ကြောင်း၊ ထို့အတူ PR  စနစ် ကို ဆောင်ရွက်မည်ဆိုပါက PR Immigration Act (နိုင်ငံခြားသား အမြဲနေထိုင်ခွင့် ဆိုင်ရာ လူဝင်မှုကြီးကြပ်ရေး ဥပဒေ)ကို  ပြဋ္ဌာန်းသင့်/ မသင့် စဉ်းစားဆောင်ရွက်သွဦးရမည် ဖြစ်ကြောင်း၊ PR စနစ် ဆောင်ရွက်ရန်အတွက် PR စနစ် စိစစ်ထုတ်ပေးရေး ကြီးကြပ်မှုကော်မတီကိုလည်း လိုအပ်သော ဝန်ကြီးဌာနများမှ ကိုယ်စားလှယ်များဖြင့် ဖွဲ့စည်းတာဝန်ပေး ဆောင်ရွက်စေမည် ဖြစ်ကြောင်း။

 

PR စနစ် ကျင့်သုံးနိုင်ရေးအတွက် ဥပဒေအရ ခိုင်မာမှု၊ ပညာရေး၊ ကျန်းမာရေး၊ စီးပွားရေး၊ လူမှုရေး၊ လုံခြုံရေးနှင့် ကာကွယ်ရေး၊ ပိုင်ဆိုင်မှုနှင့် သတ်မှတ်ချက်များစသည့် ကိစ္စရပ်များတွင် အသေးစိတ်မူများ ထည့်သွင်းစဉ်းစားရန် လိုအပ်ကြောင်း၊ ထိုကြောင့် ကျွမ်းကျင်ပညာရှင်များ ပါဝင်သည့် ကော်မရှင်ဖွဲ့စည်းခြင်း၊ ပြင်ပပညာရှင်များ ပါဝင်သည့် အလုပ်ရုံဆွေးနွေးပွဲများ ပြုလုပ်ခြင်းစသော ဆောင်ရွက်ဖွယ်ရာများကို ဝိုင်းဝန်းဆွေးနွေးလုပ်ဆောင်ပြီး ပေါ်ထွက်လာသည့် ရလဒ်များကို မှန်မှန်ကန်ကန်အသုံးပြုဆောင်ရွက်သွားရမည်ဖြစ်ကြောင်း။

 

နိဂုံးချုပ်အနေဖြင့် ပြောကြားလိုသည်မှာ နိုင်ငံတော်ဖွံ့ဖြိုးတိုးတက်ရေးအတွက် လိုအပ်ချက် တစ်ခုဖြစ်သည့် PR  စနစ်ကို မူတစ်ရပ်ချမှတ်ပြီး ဆောင်ရွက်သွားနိုင်ရေးအတွက် လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာနအပြင် အခြား ဝန်ကြီးဌာနများကလည်း တက်ညီလက်ညီ ပူးပေါင်းပါဝင် ဆောင်ရွက်သွားကြရန် လိုအပ်ကြောင်းဖြင့် ပြောကြားသည်။

 

ထို့နောက် မြန်မာနိုင်ငံအတွင်း နိုင်ငံခြားသား အမြဲတမ်းနေထိုင်ခွင့် (Permanent Residence System )( PR)စနစ် စီမံခန့်ခွဲမှုကော်မတီ အတွင်းရေးမှူး လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးခင်ရီက PR ခွင့်ပြုနိုင်ရန် ကနဦးအဆင့် စဉ်းစားထားသူများနှင့် လျှောက်ထားသူများအတွက်  ကနဦးလိုအပ်ချက်များ၊ PR  လျှောက်ထား ရာတွင် တင်ပြရန် လိုအပ်သည့် အထောက်အထားများနှင့် နိုင်ငံတော်သို့ ပေးသွင်းရမည့် အခကြေးငွေ သတ်မှတ်ချက်များ၊ PR စနစ် လျှောက်ထားသူအတွက် ခွင့်ပြု သက်တမ်းနှင့် သက်တမ်းတိုး လျှောက်ထားနိုင်မှု အခြေအနေ၊ PR ခွင့်ပြု နေထိုင်ခွင့် ရရှိသူ တစ်ဦး၏ ခံစားခွင့်ရနိုင်သည့် အခွင့်အရေးများနှင့် PR ခွင့်ပြု ထားခြင်းမှ ရုပ်သိမ်းနိုင်သည့် အချက်များ၊ PR ခွင့်ပြုထားသူများအား စိစစ်ကြီးကြပ်နိုင်ရေး ဆောင်ရွက်မည့် အစီအစဉ်များ၊ ယင်းဆောင်ရွက်မှုများအပေါ် အခြားနိုင်ငံများမှ ကျင့်သုံးဆောင်ရွက်နေမှု အခြေအနေများကို အကျယ်တဝင့် ရှင်းလင်းတင်ပြသည်။

 

ယင်းနောက် PR စနစ် စီမံခန့်ခွဲရေးကော်မတီအဖွဲ့ဝင်များဖြစ်ကြသည့်ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမြအေး၊ ဘဏ္ဍာရေးနှင့် အခွန်ဝန်ကြီးဌာန ပြည်ထောင်စုဝန်ကြီး ဦးဝင်းရှိန်၊ အမျိုးသားစီမံကိန်းနှင့် စီးပွားရေးဖွံ့ဖြိုးတိုးတက်မှုဝန်ကြီးဌာန ပြည်ထောင်စုဝန်ကြီး ဒေါက်တာကံဇော်၊ ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးကျော်လွင်၊ အလုပ်သမား ဝန်ကြီးဌာန ပြည်ထောင်စုဝန်ကြီး ဦးမောင်မြင့်၊ ပြည်ထောင်စုရှေ့နေချုပ် ဒေါက်တာထွန်းရှင်၊ နိုင်ငံခြားရေးဝန်ကြီးဌာန ဒုတိယဝန်ကြီး ဦးသန့်ကျော်၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန ဒုတိယဝန်ကြီး ဒေါက်တာ ပွင့်ဆန်းနှင့် တာဝန်ရှိသူများက PR  စနစ် ကျင့်သုံးနိုင်ရန်အတွက် လိုအပ်ချက်များ၊ ပြင်ဆင်သင့်သည့် အချက်များ၊ကျင့်သုံးနိုင်ရေးအတွက် ဝန်ကြီးဌာနအလိုက် တည်ဆဲဥပဒေ၊ လုပ်ထုံးလုပ်နည်းများအပေါ် အကောင်အထည်ဖော် ဆောင်ရွက်မည့် အခြေအနေများ ထည့်သွင်းစဉ်းစား ဆောင်ရွက်သည့်  အချက်များကို ကဏ္ဍအလိုက် ရှင်းလင်းဆွေးနွေး တင်ပြကြသည်။

 

ဆက်လက်၍ ပညာရှင်များဖြစ်ကြသည့် အမျိုးသားစီးပွားရေးနှင့် လူမှုရေး အကြံပေးကောင်စီအဖွဲ့ဝင် ဦးသီဟံမျိုးညွန့်၊ စီးပွားရေးနှင့် လူမှုဖွံ့ဖြိုးတိုးတက်ရေးအဖွဲ့မှ အကြီးတန်း သုတေသီများ ဖြစ်ကြသည့် ဒေါက်တာ ငွန်ကျုံးလျန်နှင့် ဒေါက်တာ တင်မောင်သန်း၊အမျိုးသားစီမံကိန်းနှင့် စီးပွားရေးဖွံ့ဖြိုး တိုးတက်မှုဝန်ကြီးဌာန ဒုတိယဝန်ကြီး ဦးဆက်အောင်တို့ကPR စနစ် ကျင့်သုံးရာတွင် ထည့်သွင်းစဉ်းစား သင့်သည့် အချက်များနှင့် စပ်လျဉ်း၍ အကြံပြုဆွေးနွေးတင်ပြကြသည်။

 

ယင်းနောက် ဒုတိယသမ္မတက နိဂုံးချုပ် အမှာစကားပြောကြားရာတွင် တက်ရောက်လာကြသူများက ရှုထောင့်ပေါင်းစုံမှ ဆွေးနွေးခဲ့ကြသည့်အတွက် အကြံကောင်း ဉာဏ်ကောင်းများ ရရှိပါကြောင်း၊ ယခု ဆွေးနွေးချက်များအပေါ် ပြန်လည်သုံးသပ်၍ PR စနစ် ကျင့်သုံးနိုင်ရေးကို အမြန်ဆုံး အကောင်အထည်ဖော်ဆောင်ရွက်နိုင်ရန် လိုကြောင်း၊ ယခု တက်ရောက်သူများက နိုင်ငံ့အကျိုး၊ အမျိုးသားအကျိုးစီးပွားကို ထည့်သွင်းအခြေခံပြီး ဝိုင်းဝန်းအကြံပြုကြိုးပမ်းဆောင်ရွက်ကြစေလိုကြောင်းဖြင့် မှာကြားပြီး အစည်းအဝေးကို ရုပ်သိမ်းလိုက်သည်။

 

ယနေ့ အစည်းအဝေးသို့ ပြည်ထောင်စုဝန်ကြီးများ၊ ဒုတိယဝန်ကြီးများ၊ ဌာနဆိုင်ရာအကြီးအကဲ များနှင့် ပညာရှင်များ တက်ရောက်ကြသည်။

 

 

www.president-office.gov.mm
This is the official website of Myanmar President Office